Rauf Əliyev "Keşlə"yə qayıtmaq üçün şərt qoyub

Sayta qoyulub: 16:49 12.01.2018 (243 dəfə oxunub)

Rauf Əliyev "Keşlə"yə qayıtmaq üçün şərt qoyub
 

Dünənin önəmli açıqlamalarından biri “Keşlə”nin yeni baş məşqçisi Yuri Maksimovdan gəldi. Bizim üçün hələ sirli qutulu olan Maksimov Rauf Əliyevin xidmətində maraqlı olduğunu bildirdi. Maraqlıdır ki, özü 6 aylıq müqavilə imzalayan biri futbolçunu ilyarımlıq sözləşməyə qol çəkməyə dəvət edir… Maraqlıdır… Rauf Əliyevin “Keşlə”yə məcbur olmasının səbəbi hər kəsə məlumdur. Qaydalara əsasən oyunçu mövsüm ərzində 3-cü kluba keçə bilməz.  Bu qadağaya görə Əliyev sabiq klublarından birinə qayıtmalıdı. Albaniyada bir neçə dəfə aldadılan Əliyev ən yaxşı variant kimi dilindən, mətbəxindən anladığı “Keşlə”yə qayıtmağı daha yaxşı variant sayır. Amma Bakı klubu bu durumdan istifadə etməyə çalışır. Sözsüz, Rauf bu gün Azərbaycanın ən bacarıqlı oyunçularından biridir. Belə olan halda, “Keşlə”  onunla ən azından ilyarımlıq sözləşmə imzalamaq istəyir. Rauf isə ən yaxşı halda 6+1 sistemi ilə müqaviləyə razıdır. Maraqlı məqam ondan ibarətdir ki, məsələdə son sözü deyəcək olan iki tərəf – Zaur Axundov və Rauf Əliyev vaxtilə elə ayrılıblar ki, indi bir araya gəlib məsələni müzakirə etməyə ayaq yeri belə qoymayıblar. Klub və futbolçu arasında olan söhbət hazırda 3-cü tərəfin iştirakı ilə həyata keçirilir. Son durumu ilə bağlı danışan Əliyev bir müddət futbolsuz qala biləcəyini də istisna etmədi. Hazırda ancaq fərdi məşqlər etdiyini və dost-tanışla futbol oynadığını deyən Əliyev hadisələrin necə inkişaf edəcəyini təxmin etməyə çətinlik çəkdiyini bildirdi.

XƏBƏR LENTİ